महान होय छै, जन्मऽ से नांय कर्मऽ से | अंगिका कहानी | डॉ. (श्रीमती) वाञ्छा भट्ट शास्त्री
| Angika Story | Dr. (Smt.) Vanchha Bhatta Shastri
आदमी केरऽ योग्यता खाली ओकरऽ देखे वाला लक्ष्णऽ से नांय होय छै । जे सुयोग्य केरऽ काम करे छै, वहे योगय मानलऽ जाय छै । भीतर छिपलऽ गुण के जाने केरऽ क्षमता भी होना चाहीवऽ । गौतम बुद्ध हमेशा ई बात केर पक्ष में छेला । हुन्कऽ कहना छेले कि आदमी केरऽ सामाजिक दर्जा ई बात के प्रमाण नांय दै सके छै कि ऊ केतना योग्य छै । भीतर केरऽ शक्ति पहचान के लेलऽ केकरो भीतर जाय ले पड़ते । हुन्कऽ एक चेला छेले सुणीत ओकरा महान दर्जा मिललऽ छेले । बुद्ध केए चेला ने बुद्ध से पुछलके सुणीत एतना महान कैसें होय ले । बुद्ध ने अपनऽ चेला केए एक खिस्सा सुनैलका । सुणीत पहले राजमहल में सफाई केरऽ काम करे छेले । लोगे सनी हुरऽ-मांसऽ चारो तरफ गंदगी फैलाय दे छेले, सुणीत सफाई करे छेले वेहे में ओकरऽ जिन्दगी चले छेले । एक समय बुद्ध जब भीगमंगा के साथे भिक्षाटन के लेलऽ निकलला ते ऊ समय सुणीत कचरा साफ करी रहलऽ छेले, बुद्ध के आते देखी के ऊ डरी गेले, आरो नुकाबै केरऽ जग्घऽ खोजे लागले । काहे कि ओकरऽ मानना छेले कि ऊ नीच कामऽ से जुड़लऽ होलऽ छै । छुआछुत केरऽ जमाना छेले । बुद्ध केरऽ नजर ओकरा पर पड़लऽ, हुन्हीं सोचे लागला कि ई आदमी में जरूर कोय बात छै । भले ऊ सफाई केरऽ काम करी रहलऽ छै । हमरा देखी के नुकैले कथिले, एकरा से बात करलऽ जाय । बुद्ध ने ओकरा से एक बात पुछलकात कि तो हें संघ में प्रविष्ट हेाय सके छऽ । सुणीत के मनऽ में बार-बार ऐहे प्रश्न उठी रहलऽ छेले कि हम्में ते अशुद्ध आदमी छिकां, की हम्में ई योग्य होबऽ ? बुद्ध ने सुणीत केरऽ बातऽ के सही करलका कि संयम आरऽ दमन से आदमी शुद्ध होय जाय छै । सुणीत हुन्कऽ महान चेला में शामिल हो गेलऽ । बुद्ध केरऽ सही कहना छेले कि शुद्धि-अशुद्धि ऐन्हऽ विषय नांय छै । जेकरा से जाति- आरो समाजऽ के दर्जा में जोड़ी के देखलऽ जाय । आदमी कहीं भी जन्म लै, ऊ अपनऽ कर्मोऽ से श्रेष्ठ चाहे निकृष्ट बनते ।
टुटलौ कटोरी | अंगिका कहानी संग्रह | डॉ. (श्रीमती) वाञ्छा भट्ट शास्त्री
Tutlow Katori | Angika Story Collection | Dr. (Smt.) Vanchha Bhatta Shastri
No comments:
Post a Comment
Note: Only a member of this blog may post a comment.