इमानदारी | अंगिका कहानी | डॉ. (श्रीमती) वाञ्छा भट्ट शास्त्री | Angika Story | Dr. (Smt.) Vanchha Bhatta Shastri

इमानदारी | अंगिका कहानी  | डॉ. (श्रीमती) वाञ्छा भट्ट शास्त्री
| Angika Story  | Dr. (Smt.) Vanchha Bhatta Shastri 

गांव में एक पंडित जी रहे छेलात । हुन्कऽ आरेा हुन्कऽ प्रवचन केरऽ ख्याति दूर- दूर तक फैललऽ छेले । एक दिन मंदिर केरऽ पुजारी केरऽ अचानक मृत्यु होय गेले । मंदिर केरऽ पूजा करे के वास्ते पंडित जी के जाय ले पड़ल्हैन, पंडित जी बस पर जाय रहलऽ छेलात । हुन्हीं कन्डक्टर के किराया देलका बांकी पैसा लौटाते समय कन्डक्टर दस टाका बेसी लौटाय के देलके, पंडितजी नोट मुठ्ठी में बांधी लेलका । हुन्कऽ मनऽ में पहले ख्याल ऐल्हें न कि कन्डक्टर दुबारा पैसा मांगे ले आते । आरो अपनऽ दस टाका लै जाते । लेकिन वू नांय आलऽ पंडित जी मनऽ में सोचलका, बस मालिक ते लाखों केरऽ मालिक छै, लाखों टाका कमाबे छै, दस टाका रखी लेबे ते ओकरा की फरक पड़ते, ई सोचते सोचते हुन्हीं मनऽ में तै करी लेलका कि ई दस टाका केरऽ नोट मंदिर में चढ़ाय देबे, फेरू अपना पास रक्खी लेबे, ई बीचऽ में वू स्थान आबी गेले जहाँ पंडित जी के उतरना छेल्हेंन । पंडित जी उतरता, लेकिन हुन्कऽ मन नांय मानल्हेन हुन्ही घुरी के कंडक्टर के दस टाका केरऽ नोट देते होलऽ कहलका, भाय तोहें दस टाका केरऽ नोट बेसी दै देलऽ छेल्हऽ, एकरा पर कन्डक्टर जे कहल रवें पंडित जी केरऽ होश उड़ी गेल्हेंन । कन्डक्टर बोलले तोहें गांव केरऽ नया पुजारी छिक्खऽ, पंडितजी हामी भरलका । कन्डक्टर बोलले हमरऽ मनऽ में के दिनऽ से अपने केरऽ प्रवचन सुने केरऽ इच्छा छेले । अपने के बसऽ में देखलिये ते ख्याल आबे कि अगर हम्में बेसी पैसा लौटाय दे छिये ते अपने की करे छऽ । ऐ हे देखना छेले । अबे हमरा पूरा विश्वास होय गेले कि अपने केरऽ प्रवचन में जे रंग कहे छऽ वेहे रंग अपने केरऽ आचरण भी छै । एतना कहते होलऽ कन्डक्टर बस आगु बढ़ाय देलके ।

टुटलौ कटोरी | अंगिका कहानी संग्रह | डॉ. (श्रीमती) वाञ्छा भट्ट शास्त्री

Tutlow Katori | Angika Story Collection| Dr. (Smt.) Vanchha Bhatta Shastri