गरीब केरऽ गुहार भगवान सुने छथीन | अंगिका कहानी | डॉ. (श्रीमती) वाञ्छा भट्ट शास्त्री
| Angika Story | Dr. (Smt.) Vanchha Bhatta Shastri
जिन्दगी केरऽ परेशानी से पस्त होलऽ एकरा जनानी किराना दुकान पर पहुँचली । दोकनदारऽ से एकदम दीन-हीन होय के बोलले हमरऽ पति केरऽ तवियत बहुत खराब छै । जों तो हें कुच्छु उधार देतल्हे, ते हम्में अपनऽ पति आरो बच्चा के कुच्छु खिलैतीये । पति केरऽ तबियत ठीकह होते काम पर जाय लागबऽ पैसा मिलते ही सबसे पहिले तोई कर्जा उतारबऽ । वहे दोकानऽ पर एकरा गंहकी ऊजानानी केरऽ बात सुनी रहलऽ छेले । दोकनदारऽ से कहलके एकरऽ जरूरत केरऽ सामान दै दहऽ । पैसा हम्में दै देभों । दोकनदार जनानी से पुछलके तोरा पास सामान केरऽ चिट्ठा ते होथों ने ? जनानी कहलके हों चिट्ठा छै । दोकनदार एकरा चिट्ठा बराबर सामान दे देबो । कत्ते होवे करते ? अपनऽ जरूरत वाला सामान के चिट्ठा तराजू पर चढ़ाबऽ जेत्ते भारी चिट्ठा होथों ओतने सामान दे देभों । जनानी कहलकी हे भगवान चिट्ठा कत्ते भारी होते ? मन हताश करी के चिट्ठा तराजू पर चढ़ैलकी । झोला हाथऽ में पकड़ी के खड़ी छेली । चिट्ठा बराबर एक मुठ्ठी कुच्छु मिलतऽ । भगवान केरऽ एन्हऽ माया तराजू केरऽ एक पल्ला एक दम धरती में सटी गेले । ओकरऽ जरूरत केरऽ जेते सामान छेले, जबे सबकुछ दोकनदारें तराजू पर चढ़ैलके, तबे तराजू केरऽ पलना बराबर होले । ई देखी के दोकनदार चिढ़ै लागले, माय गे माय ई चिट्ठा छिके कि की छिके, जल्दी से उठाय कै चिट्ठा देखे लागले, चिट्ठा में लिखलऽ छेले, हे भगवान हमरा की जरूरत छे, तोहें जाने छऽ । हम्में तोरे भरोसे चिट्ठा तराजू पर चढ़ाय रहलऽ छिये । अचरजऽ से दोकनदार केरऽ माथऽ ठनके लागले । सब सासमान निकाली के दे लागले । जनानी भगवान के गोड़ लागी के सब सामान झोला में भई लागली गहंकी ने छेले ओकरऽ रकम पुछलके आरो दोकनदारऽ के पैसा देते हुवे कहलके हमरऽ पैसा आज ई कामऽ में लागी के, हम्में धन्य होय गेलां । आज प्रत्यक्ष देखे ले मिललऽ कि प्रार्थना सच्ची होय छै ते भगवान जरूर सुनै छथीन गरीब लाचार केरऽ मदद करै ले सब समय तैयार रहे छथीन ।
टुटलौ कटोरी | अंगिका कहानी संग्रह | डॉ. (श्रीमती) वाञ्छा भट्ट शास्त्री
Tutlow Katori | Angika Story Collection | Dr. (Smt.) Vanchha Bhatta Shastri
No comments:
Post a Comment
Note: Only a member of this blog may post a comment.