विदूर नीति अपनाबऽ | अंगिका कहानी | डॉ. (श्रीमती) वाञ्छा भट्ट शास्त्री | Angika Story | Dr. (Smt.) Vanchha Bhatta Shastri

विदूर नीति अपनाबऽ | अंगिका कहानी  | डॉ. (श्रीमती) वाञ्छा भट्ट शास्त्री
| Angika Story  | Dr. (Smt.) Vanchha Bhatta Shastri 

विदूर बहुत गरीब ब्राह्मण छेला, गरीबी केरऽ हद छेल्हेंन साग भी खाय छेला ते अनोनऽ । नोन  किने केरऽ भी पैसा नांय छेल्हें । लेकिन पैंसा उधार नांय मांगे छेला । काहे कि पैंचा घुराबे केरऽ शक्ति नांय छेल्हेंन । विदूर नीति से जिये के लेलऽ तरीका बढि़यां बतैलऽ गेलऽ छै । विदूर नीति में लिखलऽ छै कि हर आदमी के अपनऽ सामर्थ्य के अनुसार ही काम करना चाहीवऽ। जेतना लम्बा चादर हुवे, ओतने ही गोड़ पसारना चाहीवऽ । कत्ते बेर देखलऽ गेलऽ छै कि अपनौ झूठा शान के लेलऽ आदमी अपनऽ सामर्थ से ज्यादा खर्च करे छै । आरो ओकरा लेलऽ उधार कर्जा में डुबी जाय छै । आदमी के अपनऽ आमदनी के अनुसार ही इच्छा रखना चाहीवऽ । कत्ते लोगऽ केरऽ मन वश में नांय होय छै । वू अपना इच्छा के पूरा करे के लेलऽ दोसरा से उधार लै ले पड़े छै । दोसरा से लै के पैलऽ सुख सुविधा कभी स्थायी नांय होय छै, क्षणिक सुख बहुत कष्टकर होय छै । जों करजा नांय चुकायबे ले पारलकऽ ते अपनऽ परिवार के भी परेशानी में डाली दै छै । जे आदमी हमेशा करजा से बचलऽ रहे छै, वू बहुत सुखी मानलऽ जाय छै । अच्छा लोगऽ साथ संगति राखै छै आरो विद्वानऽ से दोस्ती राखे छै, आरो ओकरा साथ समय बिताबे छै, वू बहुत ही सुखी मानल जाय छै । खराब लोगऽ केरऽ संगति केरऽ परिणाम भी खराबे निकलै छै । जे लोग हिंसक आरो दुष्ट से मेल मिलाप राखे छै, ओकरा आगे चली के परेशानी केरऽ सामना ही करै ले पड़े छै । जेकरऽ दोस्ती अच्छा लोगऽ के साथ छै, वू बहुत सुखी होय छै । ऐहे से दोस्ती करे से पहले अच्छा तरह से सोची समझी लेना चाहीवऽ कि हमरऽ दोस्त किरंग छै, एकरा साथ दोस्ती करना चाहीवऽ कि नांय ?

टुटलौ कटोरी | अंगिका कहानी संग्रह | डॉ. (श्रीमती) वाञ्छा भट्ट शास्त्री

Tutlow Katori | Angika Story Collection| Dr. (Smt.) Vanchha Bhatta Shastri