बड़ी मिट्ठऽ | अंगिका कहानी | डॉ. (श्रीमती) वाञ्छा भट्ट शास्त्री | Angika Story | Dr. (Smt.) Vanchha Bhatta Shastri

बड़ी मिट्ठऽ | अंगिका कहानी  | डॉ. (श्रीमती) वाञ्छा भट्ट शास्त्री
| Angika Story  | Dr. (Smt.) Vanchha Bhatta Shastri 

मोहनी सिन्न रहे लागलऽ छेली । ओकरऽ पति के ऐत्ते कम उमर में चीनी केरऽ बिमारी कि रंग होय गेले । चिन्ता में डुबलऽ रहे छेली, अभी हुनी जिन्दगी देखलऽ की छथ । पहाड़सन जिन्दगी पड़लऽ छै । बिना मिठ्ठऽ केरऽ किरंग रहता, केत्ते पसंद छेल्हें, हुन्का रसगुल्ला, खीर, ओह, हे भगवान, फार्ट छेले मोहनी केरऽ करेजा । (कलेजा) आज चाय बनाते समयपति के लेलऽ फीकी चाय निकाली के अपना में चीनी डालते समय हाथ रूकी गेले । अबे हम्में भी नांय पीबऽ चीनी वाली चाय । जबे हमरा हमेशा मिट्ठऽ केरऽ अनुभूति कराबे वाला ही फीकी जिन्दगी जी रहलऽ छथे, त हम्में कथी ले मिट्ठऽ चाय पीबऽ । फीकी चाय ही दोनों कपऽ में भरे लागली, तभिये पति बाजारऽ से तरकारी भाजी लेके रसोई में दै ले गेला । हुन्हीं देखलका चाय वाला बर्तनऽ से सीधे दोनों कपऽ में छानी रहलऽ छथ । पति निराश जेन्हऽ मुस्कुराते होलऽ बोलला, आज हमरो हिस्सा में चीनी डाली देन्हऽ की ? भूलाय गेल्हऽ हम्में बिना चीनी केरऽ पिये दिये । नांय, अपनऽ वाला में भी चीनी नांय डाललऽ छिये । एके रंग बनाय लेलिये । काहे भाप ? हम्में कहलिहेन हमरा से भी मिट्ठऽ नांय खैलऽ जाते । पति प्यार से मोहनी वाली कप में दु चम्मच चीनी मिलाय देलका, हमरा चीनी खाय केरऽ घुटन डबल करबाबे केरऽ कोशिश दुबारा नांय करिहऽ । एक ते हमरऽ चीनी छुटी गेले, ओकरा पर तोहें भी मिठ्ठऽ छोड़ी देभे हद होय गेले । मोहनी ने हुन्का रोके ले चाहल के । तब तक पति अपनऽ काम करी चुकलऽ छेला । बिना मिठ्ठऽ केरऽ शरीर कमजोर होय जाय छै, स्वस्थ आदमी केरऽ । तोहें कमजोर होय जाभे ते हमका के, देखते । हमरऽ भी स्वार्थ छै न ? कही के हँसे लागला । चुप रहऽ, पति के मजाक वाला स्वभाव छेल्हेंन । दोनों चाय पीये लागली । एक चम्मच चीनी वाली चाय भी मिठास से दूर लागी रहलऽ छेले । लेकिन पति केरऽ फीकी चाय केरऽ स्वाद बड़ी मिठ्ठऽ होय चुकलऽ छेले ।

टुटलौ कटोरी | अंगिका कहानी संग्रह | डॉ. (श्रीमती) वाञ्छा भट्ट शास्त्री

Tutlow Katori | Angika Story Collection| Dr. (Smt.) Vanchha Bhatta Shastri