शिक्षा सब से प्रभावी | अंगिका कहानी | डॉ. (श्रीमती) वाञ्छा भट्ट शास्त्री
| Angika Story | Dr. (Smt.) Vanchha Bhatta Shastri
संत तिरूवलरवर जोल्हा छेला, हुन्हीं रोज अपनऽ बुनलऽ कपड़ा बाजार ले के जाय छेला । कपड़ा बेची के अपनऽ बाल- बच्चा पोषे छेला । एक दिन बाजार में एक आदमी संत जी के पास पहुँचलऽ, हुन्कऽ नम्रतापूर्वक बात सुनी के साधु केरऽ ढोंग समझी के हुन्काऽ परीक्षा लेबे केरऽ सोचलकऽ एक साड़ी उठाय के दाम पुछलकऽ । संतजी एक टाका बतैलका, आदमी ने साड़ी के दु टुकरा करी के दाम पुछलक, संत जी आठ आना बतैलका । आदमी फेरू दु टुकरा करी के दाम पुछलकऽ संतजी एकदम शांत होय के चार आना बतैलका । ई तरह से ऊ आदमी साड़ी के टुकरा- टुकरा करते गेलऽ आरऽ दाम पुछते गेलऽ साड़ी केऽ दाम खतम होय गेलऽ । सेत जी चुपचार देखते रही गेलात आदमी अपनऽ धन केरऽ घमंड देखाते होलऽ दु टाका संत जी के देते हुवे कहलकऽ ई धिक्खों तोरऽ साड़ी केरऽ दाम । संत जी केरऽ आँखो से लोर चुवे लागल्हें । भाय जबे तोहें साड़ी किनबे नांय करल्हऽ हम्में साड़ी केरऽ दाम किरंऽ लेबै ? आदमी के भी पछतावा होवे लागले । तबे संत जी बोलला, बेटा, साड़ी केरऽ मेहनत केरऽ दाम दै सके छऽ ? एकरा लेलऽ किसान सालभर खेत में पसीना बहाबे छै, हमरऽ कनियाय सूत काटै छै आरो बुनै में रात- दिन लागलऽ रहे छै । हमरऽ बेटी सूतऽ रंगे में आरऽ हम्में ताना- बाना करी के साड़ी केरऽ रूप दै छिये । ओकरऽ बाद बाजार में लाये के बेचै छिये, तबे हमरासनी के रोटी मिले छै । एतना सुनते- सुनते ऊ आदमी के आँखी से लोर छलके लागले । संतजी से क्षमा मांगलकऽ आरो भविष्य में केकरो साथ हैरंऽ व्यवहार नांय करे केरऽ किरिया खेलकऽ । ऊ आदमी संतजी से पुछलकऽ तोहें पहिले ही रोकी के ई बात कही सके छेल्हऽ फेरू हैरंऽ काहे नांय करल्हऽ ? संतजी कहलका जो तोरा हम्में पहिले ही रोकी देतिहों ते तोरऽ संशय पूरा तरह से नष्ट नांय होति हों । आरो तोहें शिक्षा के आत्म शांति नांय करै ले पारतिहऽ । दया आरो क्षमा के साथ देलऽ गेलऽ शिक्षा आदमी के बदली के राखी दै छै । आगे ओकरऽ प्रभाव अचूक होय छै ।
टुटलौ कटोरी | अंगिका कहानी संग्रह | डॉ. (श्रीमती) वाञ्छा भट्ट शास्त्री
Tutlow Katori | Angika Story Collection | Dr. (Smt.) Vanchha Bhatta Shastri
No comments:
Post a Comment
Note: Only a member of this blog may post a comment.